2010-mit 2014-imut inuussutissarsiutit aaqqissuussaanerat
2013-ip 2014-illu akornanni inuussutissarsiutit aaqqissuussaaneranni suliffeqarfiit amerlassusaanni 1,5 procentinik appariartoqarsimavoq. Tunisinermut nalunaarsuutinik nalunaarsueriaatsip allanngortinneqarneranik pissuteqartumik aamma akissarsiat katinnerisa annertussusaat 8,7 procentimik appariaammik sunnerneqarput.
Inuussutissarsiutit aaqqissuussaanerannut kisitsisitigut paasissutissannut Kalaallit Nunaanni inuussutissarsiornerup ilisimasaqarfiginissaa aammalu misissoqqissaarnissaa tunngaviuvoq. Saqqummersitami uani piffissaq ukiuni tallimani 2010-mit 2014-imut sivisussusilik aammalu Kalaallit Nunaanni inuussutissarsiutit aaqqissuussaanerat pineqarpoq.
Saqqummersitami Kalaallit Nunaanni suliffeqarfiit pisortat allaffissornikkut aqutsinerisa, illersornissap aammalu isumaginninnermut qularnaveeqqutit avataanniittut pineqarput. Tamanna Namminersorlutik Oqartussat piginneqatigiiffii aammalu suliffeqarfiit iluanaarutaasunit ingerlanneqartut misissuinermi ilaanerannik isumaqarpoq, pisortaniilli suliffeqarfiit nalinginnaasut annertunerpaartaat ilaatinneqaratik.
Piffissami suliffeqarfiit amerlassusaanni ineriartorneq taakkunanilu akissarsiat katinneri suliaqarfinnut, piginnittuunermut pissutsinut aammalu nunami sumiiffinnut naleqqiullugit annertussusaat saqqummersitami tamakkiisumik saqqummiunneqarpoq.
Kisitsisitigut paasissutissani pingaarnertut najoqqutarineqarput Naatsorsueqqissaartarfiup suliffeqarnermut nalunaarsuiffia aammalu isertitanut nalunaarsuiffia Akileraartarnermut Aqutsisoqarfimmi nalunaarsutinik tunngaveqartunit pilersinneqarsimasut. Nalunaarsuutinik suliaqarneq aammalu aaqqissuussaanermut tunngasut allat saqqummersitami periaatsip immikkoortuani nassuiarneqarput, najoqqutanulli nalunaarsuutinut annertunerusumik periaatsit nassuiaataat suliffeqarnermi kisitsisitigut paasissutissani aammalu isertitanut kisitsisini paasissutissani saqqummersitani kingullerni nassaarineqarsinnaapput.
Kalaallit Nunaanni inuussutissarsiornermi suliffeqarfiit assigiinngitsut Namminersorlutik Oqartussat suliffeqarfiutaannit ingerlatanit annertuumik sunnerneqarsimasuupput. Kalaallit Nunaanni inuussutissarsiornermi pissutsit immikkuullarissut atuutsinneqartut ersersinniarlugit saqqummersitamut ilassummi (immikkoortoq 4) Namminersorlutik Oqartussaq suliffeqarfiutaat pillugit kisitsisinik pingaarnernik tulleriaakkanik pilersitsisoqarpoq.
2014 aallarnerfigalugu nalunaarsuutinik suliareqqitaanngitsumik nalunaarsueriaatsip allanngortinneqarnerata kingunerisaanik tunisinermut nalunaarsuutini tulleriaani nalunaarsuutini ajutoortoqarpoq. Tamannalu 2013-imit 2014-imut akissarsiat katinnerinut nalunaarsuutit, pingaartumik suliaqarfinni Aalisarneq- mi aammalu Atortussiorneq – mi, sanilliunneri mianersoqqissaartuunissaannik isumaqarpoq. Tassani 2013-imi tunisinermit ”akissarsiat” ilanngaateqanngitsunit naatsorsorneqarmata, tassa imaappoq tunisinermi aningaasat amerlassusaat akissarsianut naleqqiunneqarput, taamatullu 2014-imi aningaasartuutit ilanngaatigereerlugit naatsorsorneqarlutik. Periaatsimi allannguineq taamaattoq 2014-imit akissarsiat katinnerinut qaffasissutsit minnerunerannik aammalu eqqortuunerunerannik isumaqarpoq. Periaatsimi allannguineq pillugu annertunerusumik nassuiaammut suliffeqarnermut kisitsisini paasissutissani saqqummersitami kingullermi Immikkoortoq 2.3.3. (2014-imi suliffeqarneq) innersuussutigineqarpoq.
Pineqartuni ataasiakkaani tamakkiisumik inernerit aammalu katinnerisa annertussusaanni dicimalini nikingasoqarsinnaavoq tamannalu akunnaalliliinernik peqquteqarpoq.